Вайн Мехк-Дас, Россин Турпалхочо Кадыров Ахьмад-Хьаьжин Рамзана шен омрица 2023 шо «Нохчийн меттан шо» аьлла билгалдаккхар бахьана долуш, гIуран беттан ткъолгIачу дийнахь Соьлжа-ГIалин лоьмар 49 йолчу ишколехь дlадаьхьира «Къам ца кхиъча, мотт ца кхуьу, матто кхуллу Даймохк а» цIе йолу цхьаьнакхетар.

Мероприятин коьрта хьеший бара Соьлжа-Гlалин Мэран заместитель - дешаран Департаментан куьйгалхо Ахматов Зелимха, дешаран Департаментан куьйгалхочун заместитель волу Хизриев Мохьмад.

Ишколан белхалоша хьалхарчу гIат тIехь хIоттийнера ширачу дахаран сурт: йуьйцина керт, дIайоьттина йол, мангала ваха кечвелла мангалхо. Актови зал тIе кхаччалц дIахIиттийна ширачу хIуманийн гайтар: нохчийн пеш, истангаш, ага техкош йоккха стаг, тIаргIа къажбеш мехкарий и. дI. кх.

Дешархоша жигара дакъалецира оцу цхьаьнакхетарехь. Цара йийшира нохчийн меттан гIарабевллачу классикийн Даймахках, ненан маттах лаьцна поэзи, тайп-тайпанчу эшаршца хаийтира шайна нохчийн мотт хьоме хилар, гайтира театральни говзалла гIиллакх-оьздангаллех лаьцна постановкица.

Цхьаьнакхетаран чаккхенехь Ахматов Мовлин Зелимхас баркаллин дош элира кечам бинчу хьехархошна, дешархошна а. Цо тидаме ийцира Соьлжа-ГIалин муниципальни дешаран системехь къеггина хаалуш болу нохчийн мотт Iалашбарехь а, кхиорехь а болу кхиамаш.

#нохчийнметтаншо #къоманседарчий #МовлинЗелимха #СоьлжаГlалиндешаранДепартамент